ايدول يوضا

للشاعر الحاج يحيى أحمد ن عمر

تباريغ اتوات دي بابا ئي الان

يقّيم ئي تازّا د ؤجرّاو غرسن

تاروا-س ئي خلعن انسين اتغرتن

ئمطّاون اقدان دو غرت ول يقدي

نّان :"واسي ول ينّي لبابور ن لفلّين

مي يلا يتمتات وا ستّيلي شهادت

سلت ا ميدن انّيني نعاود

تيرشفت ول تبدّي س وهوهو ن ويدي

نّيغاسن:" ايدي تهوهو مي يرڤب

ئمكرض تادارت د مي تخس اتّركس

تامورت الحودّاڤ تعيا س ازمان-و

يدول-د وي اتّارّان البال-س د ايدي

اس ن الجمعة سي تقدا تزاليت

ارڤَبغ منّاو ؤتفنت اعنّڤ

انّاني خالد بنُ الوليد ئتوب

يصبح-د ئروح اس-و ن لهردي

انّيغاسن :"ياك خالد بن الوليد

يموت يا بكري باتّا دّرنّتيد

انّاني الان سن ،اقديم يموت يا

وُو نسلولتّيد نسّن ول يسّمدي

تدّارت ن ا تّوبت تلا س تيويرا-س

ميمي تقبلماس ئنڤزاومد س انّج

انّاني تادّارت ن اتّوبت اوّوني

نتّس تيويرا-س ،ماغر داوحدي

بتّا غامنيغ ا تموسني ن يوش!

امي وفين تلّيد تسدد دافجاج

اوينام اتّاجريوت غل ؤبوض ن ادّونيت

انيل دامكورّاز كلين غفم يجدي!

توارزن اسنادك تواكُّرنت تيبراتين

تواحوان لكراسا توكرضا ف ميدّن

تّان باب ن ميدّن يلا يخزّرتن

سوچمت غي دوسّان اتنتش تيمدي

ئغرداين نسين ركسن ماغر موش

يوكر-اس ند تينسا يطّف-تن ينّا

:" ايّات سمدات اركاس-وّم اعدّيس-ئكُ "

اي تحلو تْحنحوت مي ول تستي تيدي

ابلبز افران ان تيدرت ئي فران

انتلع امجار اد يدّا ن ورنان

انّوده ازْضَا انوده ئڤُّا

ارضون ن تواشّيت نغيلي ن ئمندي

ول تلّع اتيازيط دويّت دادويّت

ؤشينام اشّيعت تلّيد اتّامدّا

اتسن-ام تيبولبولين اريّن-امد د افروح

يلّوز، دوجلف-س دتراشا تمدي

ماي تلّيد ا شّيخ طفيّش! ماي تلّيد !

ونّان اشسغن س بسّي ن اشّيعت

واسنتيّخ-د ان ؤڵم ، اڵم ساغاديخ

يوبر يا امنّاس ،يقدا يا امودي .

ؤرغ غادّارّنْ ئمان-س اتّيزيت

اضلا ن تيط اديرغ دتفاوت ول توغي

سوكز-يي اوو غاد اتّزدي

سي نتّوغ نتّوغ ئمندي س-غرنغ

نّكلتْ نمجّرتْ نتّتْ نسشّا

ئمار-و ندولد نتّچ ٷران

س ئبيباتن ،سماني انچ ئيد دادّي

نلّول-د د يخسان انّمت د يخسان

نشنين ئي وشطي ٷهو ئي وندال

نشنين ئي وسدّر ٷهو ئي ونضال

نشنين ٷهو داي ديدي

ها اسقامو ن باعبد الرحمان ؟؟ ئنيتي ؟؟

ميمي تسبيدلم الكورثي س الكورسي!

انّاني تالقّي-س ياك د يلس-س يكرد

انشّنين ٷنغيس اسنچ ديس ديدّي

اتاوّات ٷنغيس البوليتيك تاعشيرت

ٷنغيس البوليتيك تامجيدا

اعزّاب بتّا ئضبّع احولي-س

الكورسي اتيقّن سماني ابدّي

ساد يتشر واضو تالقّي ن وار جوم

تايدرت ئي اشّورن تدوڤل-د اد شيدو

ها تايدرت ئي فران !،لاش واضو تركس

اغنيف........ ! ادسّغدغ داسغدي

اي اسر ن يوش اتشر-د شقل-اسن

ئي تاروا ن ات رستم لكيتمان س تحلانت

القبلت د واشينطون ليسلام يتواغراس

ا نّتنين الاّن اتّاوين-د ئي لعايدي!

تادّارت تازوڤُّاغت ديلان سي توضا

تادّارت تاملالت تلا يا اتوطّا

تشرتد اسندول ئي تدّارت ٷيوش

نشنين اسدسّات تاوّات ن تغدّي

 يونيوه 2002 1

 

المرجع : : انثولوجيا الأدب المزابي ⵉⴷⵓⵔⵔⴰⵏ ⵏ ⵜⵙⴻⴽⵍⴰ ⵜⵓⵎⵥⴰⴱⵜ‎