ن تيدت " لمعاش يتواشا س تيطاوين "

ئنزان أتنفاس نات مزاب  أمثال وحكم وقصص مزابية 2

الشاعرمصطفى بن كاسي العلواني

يواتوم أنبراس : مصطفى ن كاسي نات علوان  زينون

أنان ئمزوارنغ ئوايني ئنان: " لمعاش يتواشا ستيطاوين ، دسا ت ئمي " ( الأكل يؤكل بالعينين قبل الفم)

أولعريكن ئمزوارنغ دي تاضفي أغنوشين ، غرسن تيدت..

مي نقل غل أوغماين ( الألوان) ئيدجو يوشنغ أمقران تامدورتو ، أنبار ، أترس تاونجيمتنغ، أتفورهت....

أجليد أموقران أوليعريك سيدجو مناو نوغماين ، أش حد أسجنغ يخس مناو أتراس تاونجيمتس غرسن أدمناو ئروقل غفسن....

جار أوملال دوبرشان أناف مناو أغماين أبهان أسبهان تمدورتو ، ماني ئخسن ئلين : أجنا ، تامورت أمغ جار أوجنا أتمورت...

أزيزاو أجنا أمغ ئلل، أدالي تامورت أنج أوباطاطي نيجدي تاورغي نتفويت دتزوقغيس ميتلا أتونوي أمغ أتاليد،..

ئغماين نونفدو أمغ نتجرست أمغ نتفسوت أمغ نتكرزا أيولون أبين أوغماينسن أسيسن..

آش ئقن سوبهاس....

ميرسين أتزيوا أمغ ألمترد أمغ تاجرا...بابس يتجاوان ئكنع سوخزارنسن...

أين فلفلا تازوقاغت ئقورن أنج تزيوا نيسوفار أمغ نيوزان ديد ويسوم أكبور د تشورداسين...لاش باتا أنيني ديس ..

أين زواقا تاعكريت..

أين أوشو دوينيو ساين كابويا تاداليت أمغ تاوراغت...

أين أوشو دبزرمو ساين تدولي أماسس..

أوشو تفسناخ ئقورن...ساين تفسناخ تيحنيين....

أوشو ديفراغ نونفدو : ستخسايت ( تاميسا) دكابويا ....

أوشو ديسوفار سمناو ئنكالن نتجمي أدجيناس تادوليس...

أين تزوضا دالعادة سرفيس أملال دوودي أملال ديوزان نوسفسي ئقهويين.، أوضنن تامنديلت تادمغيت تاوراغت...

أين كاوكاو ئشورغن د تكماريت تاملالت.....دنعناع أدالي سودون..ئلاتاي أوراغ.... تاجمي دسات وامان أدجورن تارجا..أنج أتساجلت ديس مناوت أتقديسين أيبهانت ىش ئكت سوبهاس دأوغمايس ....أوجار مي جرون أدالي دووراغ ئقن فيديس نوضيضن...

أمان سوجديد أبوعودي ، أتفوحان سقطران أتواسون تاقدوحت أمغ سوماوال...

تاكضورت س تيني تاوراغت ديكراين ئشوراغن...أتستي سوودي أملال..

ئباون نودريم ديخمريين أدسن تادرا عاشورا....

ئملاون ، أنغ أونكيرن ، أوتشيدن : نتمجوهرت ديزقاغن أمغ ألان زوقغن....

ونسيويل سيملاون نوتقبالا ديغس نوتشيضن ..ديوراغن أليغس ئلان أماسنسن يتوارقاب، ستين ستممت..

أويسن مينزرو أون ئغماين س مناو أوغماين أنمتر يوش أموقران أغنيرني ، يوشانغد أوجار تدارتس ن ديما ديما..

ن تيدت تيطاويننغ أتريحن مي رقبنت أون أوغماين ماني ئلان تمدورتو...ولتنيدجي يوشنغ غي دورار..

ياك أنيغاوم : "تيطاوين تتنت دسات ئيمي..." ، أمي توفيم ئمارو ألان دساتنوم..أليغ أسبهلغاوم سولاسنسن...

العلواني مصطفى بن كاسي ( زينون)