تانفوست ن تيقضفت د تبوزبوزت

ئنزان أتنفاس نات مزاب  أمثال وحكم وقصص مزابية 1

الشاعرمصطفى بن كاسي العلواني

أنبراس، أمدياز، أسلماد: مصطفى ن كاسي نات علوان   زينون

 

ئمزوارنغ أنان ديوايني ئنان، مناو ئنزان أزولن ، أبهان....

أش أشرا تامدورتو ألان أجيند ديس أوال...

أتانفوست ، أمغ دينزي، أمغ داوال يميس، أمغ دازلون، أنغ ديكت أتغاوسا تساوال غفس...

" ويوفين أوليطيف أديكلب ( أديبرس) أوليتيف"

ديوايني أغندجين نيوالن دينزان أتنفاس فواسي أتاساسد أتغاوساس ألفوسس ولتيتطف ، يتاجات أتزوا س جار ئفاسنس..

يتاجا ئمار ئزوقا س جار ئفاسنس وليتيدجي ديس أولا دشرا..

مي توزير غفس أديدول يتهاتا يقار أمي أوفيغ أليغ أدجيغ أين أشرا ، أمغ أقديغ أتغاوساك وساني سيتوغ جار ئفاسنيك....

" مي توفيد تاسيرت أزض أغجارتش دومنسيتش "

أن مانشي نسن تاسيرت بكري غرس أزل، أوجي أيولونت تيدار ديسنت تيسيرا ن وزضا نيمندي ديردن ،....

تيدار ئديسنت تيسيرا أتواحسابنت ئضوضان..

مي يخس حد أديزض أديقدا أتغاوساس ، أديزوا لباب نتسيرت أتيمتر مناو وسان أمغ ئيارن دسات ما ستاس أدالتس...

سوامني اديجوجد منشت ئنجم نيزضاتن ، يلا يسن مييزوا أديزض وستيس ئكت تيتشلت تيضيضت تنوبا نوزضا..

" ويخسن سوف أسيخدم لقوايل أحمانت "

أينولو نسن بلي سوف أتجناو أتاسند أوجار تاكرزا أتجرست....

سوف غرس أبريدس، يدجور ديس ، يسن تيسنساس....

سوامني أت بكري أنفذو ئلان لاش ديس تيجناو ديسافن أتادجان ئدتويزا أدوحباس صتشن ديس أيني ئرزن نتسمباض د ترجوين نوسوف، أتتسن ئجدي دوضغا فوبريد نوسوف، أتاران تيرسين ئلينت أن مانشي ئتوغنت،...باش ميديوسو سوف تاجرست دتكرزا أدياف ئمانس ، اديشار تيجما أترسين ديحوباس...

"حدن ئفاسنس أوليريدن "

يتوانا أون ئنزي ئواسي أستاس أتغاوسا غاليفاسنس، وليتنجم أتيطف أتيبي أمغار واسيوجد ، أن واسي يخس أديطف ئكت تيفيرت سيقن حد ، أدياف ئفاسنس لبضن ، ديخنيرن، أمغ أوجي زدقن، وليتنجم أسيني ئحدني سودجم أدسيردغ ئفاسنيك، أولا دحدني واسيسودجوم أديزوا أديجتيد ئتت ئمانس.

"أس أدزوان أولديدوقل "

ن تيدت أس أدزوان سييلاننغ أولديدوقلن...

أنبي أسيس منشت ئنجم ن تضفي ، ندج ديس تيوحديين أتزعيمين ، نزدي ديس ئنافننغ، نيجور أبريد نيمزوارننغ أغندجينتيد يمسيس يغدي يتاوي غلتدارت نيوش

" أدسدنت دتش تيلوليوين نونفذو"

توني ديكت تنفوست أتالسنت ئمزوارننغ ئطاروانسن ميخسن أدتصن ، أمغ ميجرون ديدسن أترارن أتالسن فتنفاس...

تانفوستو تضرا جار تقضفت أتبوزبوزت ئتسيوسيون..

أن مانشي نسن تيقضفت أتهبر أنفذو اتفسوت ..أتهبو أتشبو...أتاوي العولة ألتدارتس تسكراميت ئوسان نتجرست ئلان ديس تيجناو ولتنجم أنفغ ستدارتس أتكلب فباتا أتش، أولا تفغد ولتيف باتا أتش...

ىش غبشا نونفذو أتفسوت أدفغنت تيقضفين ستدارنسنت أدجنت أستور يميس يغدي، ئكت سدفر ئكت ، أدزوانت أدنقانت ايني أدافنت أنلمعاش ئوسكرمس ئوسان نسمض.....

أبريدنسنت ، أتافنت أش اس ئكت أتبوزبوزت ئتسوسيون أدزلون تسلوليو ، تدجو ضار أنج ضار، تسومت فوسس، أسينينت أغار أتنقيد أغشمين ايني أتسكرمد ئوسان غاداسن ، أتص غفس أتدول غلوزلونس أدوركاس، أسنتيني: اسو أليغ أوفيغ أيني أدشغ ، أدربح أزلون دوركاس ، وسانو ولدوقلن ، أشا "أديرحم ربي ".

غي داضلا نتيط ، أبدانت تيجناو أشاتنت، ديسوفيرن هوقاند، ايولو لهوير أوتفن تيدارنسنت كمشن ديد طاروانسن، أتقيسن باتا أدشن منش ئنجمنن اسودجومن ملمي أتاس تافسوت أدفغنن غي تبوزبوزت ولتوفي باتا غاتش ، تفغد أتكلب أزغار توالم أتاف أشرا....أتلقيس ولتوفي أولا دشرا يتواشا، ولتنجم أولا أتيجور سن ئدسيلن أتبرس فلمعاش أمغار سمض، أتجناو أشاتنت..

تنا يقيمد غي أدزويغ غلينارقيك ( الجيرانيك) أدمترغ ستقضفت أيترضل بسي نلمعاش ، تزبدباس تاورت ، مناوت تيتشال ، ألتهتل ، ساسترزم تيقضفت : أتغرتاس تبوزبوزت، تناياس أليغ ألوزغ غيري مناو وسان أوليتيف أشرا ئميك، باتا أتنجمد أيتوشد أشرا ئودم نربي، أمترغ ميديوتف الحال،...تراس تقضفت : " أدسدنت دجم تيلوليوين نونفذو"...أغار زلون تسلولود أيندوني دلمعاشنم.....ناتصلح غفس تاورت فوودمس...تزوا تجتد أتبيديو..

تاضفي أنبي ساون ئنزان أتنفاس:

بابس أديسودجم ، ئوجد ئمانس باتا يخس أديقدا أتغاوساس..أديلي أنتا ئسودجوماس أمغار نتاها وستسودجوم

بابس وليتيجي وسانس زوقان أمني غي أورار دييضس، أديربح منشت ئنجم...

أديسمونكز ئضصس يرنيت أغيلس....

ولتيلي أممي، أيوا دانجلوم، ئلي دانجيم ، شمر فوغيلتش، أتعافرد منشت ئتنجمد، تسند ئضس يلا أنيل باتا تخدمداس ئمارو.

ئزيغ ئلي أيوا أتيقضفت ئتشلان فيمانس، ولتسودجوم ئميدن أسوشن ، والتيلي أتبوزبوزت ئتسيوسيون أتانجلومت أتشلا فات ربي....

أنبراس، أمدياز، أسلماد: مصطفى ن كاسي نات علوان ( زينون)

العلواني مصطفى بن كاسي

تغردايت ، الأربعاء 14 جوان 2017