تابرات ئي باباكُ !!

ڤاع مانش ئويغ ايابا د يزلوان

ازل-تش ول تسمَدّيغ ! ديما د أمقران

انغّ نش ؤليغ تهاتيغ ئديسان-تش

مانش اشاوضغ دشتش توجرد يتران

ڤاع مانش ؤريغ د تيفراي أزمام-ئكُ

نغّ غف-تش ؤلسغ ئخف-ئكُ يسمضْران

باتَّا نش اسوّ س وعزام ئفاوغ

اسَّنْ داسَجْمِيتش سي تّوغغ دامزّان

دي تجمّيتش جْموغ تسوسيوغ داجضيض

سي دْجيغ افريوَنْ أفجغ غل يجنوان

تيزننت ئى تنكلد ايابا تغميد

دئوالن-تش ؤليكُ نطُون ئزوران

منشّت ئي تلعغ سلحواف ن ئجوواض

ديتبيرن تازدَيْت غل ييمالْ تْهَتَانْ

اجلفيكُ دغلان تمورتْ نُ ؤمازيغْ

ديس تسّولغدي اوال نُ مَقْرَانْ

اسجمي غيرتش ؤهُو داي دوال

ؤهُو د اسحسح نّغ دتيتا دوڤران

اتْلَعْ ايابا سرس تونجيمت-تش

تسكلد ئبليون-تش تدهنتد أ ل امان

نشِّ اتّسيت-تش قاع غل ماني زويغ

ادِييليغ دودم-تش ديما دوڤغرسان

ديما بدّرغاتش ئلسيكُ س توحديت

ديماغزّرغاتش ديتري جار ئتران

سوزل-تش ادترغ ؤيوش املاّيْ

ايسميس تيشليك، ف وبريد ن لقوران

يوشيّد تيفاوت، نْ يور ن وكّز د امراو

يدجَيِّي اتَّالويت داسْفار ن ئموضان

 

المصدر : انثولوجيا الأدب المزابي ⵉⴷⵓⵔⵔⴰⵏ ⵏ ⵜⵙⴻⴽⵍⴰ ⵜⵓⵎⵥⴰⴱⵜ‎