تيدت ن تعشيرت

الشاهر مصطفى بن كاسي العلواني

نشنين اتّاڒوان وغلان

نلا نتاويد ئزلوان

نتمترا س يوش امقران

اغنيوش س تنميّرين ن لقوران

نشاش نولي ئجنوان

سستنْ ئضان دوسان

باتا حد ئسستن ف تسكرانغ

اسنيني تعشيرت ادغرنغ

تسشّانغ س تيدي-سْ تسّسوانغ

وغنتجي نزمح تسيرضانغ

داوتم انغ اتّاوتمت تخسانغ

انتّاها د بابا انتّاها د ماما-نغ

س ؤعديس-سْ اتّيناديوين تسوفغانغد

ئي وخسا ن ميدن تلا تجروانغ

ولْ تمتير ولتني ؤوليك يهتل

تنّا لكانْ ادشمرغ اسّ-و فْ وغيل

مي خزرغ امركانتي ئزون ديدْ ؤڤلّيل

دْ ميدّن تشمّر تاهجالت دجوجيل

دْ وي تُّوغن س تاڒواك يترا ادسيل

يتغار ديدْ ايتماس ان ؤسيل

دْ واسي ولْ يعزيم يتّاري اسكّيل

اددولغ د ينّي ن تيدت ددليل

ولْ تدهنيتغ ال دخزرغ اولاوال

جار واسّ-و دْ واشّ ايتقاوال

ئي تدارت نييمان يتحاوال

ئدمّكْ ،غي لْ دفّر لاش ادوال

ايني ادييني داين داوال

غي ل دسّات ديما يخس اڒوال

امباتّا حد دفرس س ؤماوال

تْولهتْ ئي واسي ئيبرس دبراسْ

ف توشتيمين ي تّادجاياسنت ساراس

ئجروتنت يتّادجاتنْتْ د يشماس

يسّودجوم ملمي غاد ياوض انفاس

ادجينت ميدن اماسنسن دعساس

يقيم يسّودجوم ملمي غاد يبدا اغراس

تالقّيس باتّا ينيكفا غفس دلاس

ئي وشّا يلاّ يتشارا س ترغين احباس

اتاڒوا-كُ أطْفتْ فوس دي وفوس

والْ تّجات جاجنوم شوس

تسنْم مي يوتف شوس اغلّوس

ايني تقيمان س تاوفي دروس

أتش ئڤّن اديسمل ؤول-س ان لوس

ديما يزدڤ دانجلوس

اينْ دوو داوال-يكُ ايمكروس

ادجاس تايتيّ انّتّا دليموس.

 

26/03/1999

 

المصدر : انثولوجيا الأدب المزابي ⵉⴷⵓⵔⵔⴰⵏ ⵏ ⵜⵙⴻⴽⵍⴰ ⵜⵓⵎⵥⴰⴱⵜ‎