تيرجت ف وغلان

للشاعر المنشد عمر بن سليمان بوسعدة

اليغ ؤسيغد ايما

الّيغ ؤسيغد لاين تجمّا

منشّْت ن يضان ازوان غيفي

غي س ترجت الّيغ اغلان

منشّْت ن وسان أليغ ديسن

س الغُربتْ جار ئموڒان

ئتلوياييد ئيضس تيزفري

ازطّا امّاس ن تدّارْ

تايدورت تكتك ئنّاين

لبراد دنج الجمّار

ئتلوياييد ؤسان ن مزي

امّاس ن تجمي نتراڒ

ئمدو تشال نطّف ئفاسّن

غل لمجل نزوا ادنشار

ئتلوياييد ؤشّو د يسوفار

ارفيس مي ديوسو ينّار

تاكضورْتْ ن تزميط تيفيرين

د بالبالي اتّشكارت وعمار

ئتلوياييد اسا ن ئسافّنْ

زُڤّيغ غل ورڤاب س ئمزوار

الاّومنا س ئلوجان اتغارن

ديجدي ئتفوحا س ونزار

ؤسّان ن وغلان أي يبهان

الاّس-نسن دازجرار

ايوش سيووانغ غل وغلان

ترد غفنغ اضران ن ئمار

 

المصدر : انثولوجيا الأدب المزابي ⵉⴷⵓⵔⵔⴰⵏ ⵏ ⵜⵙⴻⴽⵍⴰ ⵜⵓⵎⵥⴰⴱⵜ‎