قصة قصيرة والْ اتّيلي دونتيف!

نصوص نثرية للأستاذ لعساكر يوسف

تانفوست تامزانت

قصة قصيرة

يتّوغ بكري، ئڤّن ورچاز دامزنزي يزنوزو يسّاغ دي وغرم-س. ئخدّم ئندّهْ سْ وول-سْ . أشْ اغبشّا ي تتشر-دْ دسّات ؤتوّبْ باش اديّزاڵ يزۆا غل تحنوتّ-سْ؛ امغر يچو سْ ويوال ن واسرنّغ : "يوغو تنمّيرت وي تت شرنْ-دْ بكري " .

ارچاز-و يوشو ئمان-س ئي وهبار، سي ينّا بابْ انغّ د غبشّا ال اتّنو تفيوت د نتّا ئبدّْ ف وضار. ميدّنْ اتّادفْ اتّفغْ تسّاغ، تسلاّ سّيسْ غي اوال ازعيم. ئماسّاغن ايّولون تدهانّاتن، تاممت ئلس-سْ ، ئفاسّن-س د ئمنداه س تغاوسا غل تغاوسا، ول يسّين باتّا داوداه. سوامّۆني يدول-د س ئمڔكانتيّن ن وغرمْ .

ارچاز-و واس يوشي ربِّ دايْ اڔا ئڤّن. لاشْ باتّا ئي يعزم. وختنّي دروس وي عزمن، وجار ن ئماڔ-و ، باتّا د ئغربازن 03 باتّا د تيسدّاويين 04 غي واسي ول ييغيس اد يعزم. اون ؤمزنزي يغس اديسجمْ ممّي-س ئي لاڒ د فاد، يس تشارتي-دْ يبشّْ يبڔمْ . يسّولغاس شرا ن ئسكيلن د تيرا دوعزامْ ياوي-ت غل تحنوت باش اسيسلمد تيغاوسيوين-س . ماماّ ن اون وبغور اتزڤل-اس ال دييزي ، ديما تناڤارنتّاها د ورچاز-سْ فجال-س. بابا-س يسّتشار-يت غبشا ئي وخدامْ ، د ماما-سْ تسرارا-ت اديطّس. ڤضعن وسّان دورچاز ي تّاوي ممّي-سْ غل تحنوت يسلماد-اس د تمطّوت-س تقّار-اس زدّيغ يلا د امزان اجّي-تْ ال ديمقُڔ . ابغور-انّي يوغا-س اوال ئي مامّا-س يدول-د دانجلوم ئرڤُل-اس ئي بابا-س . ايچّين دمامّا-نّي تسّمضي-اسْ انجلمْ 05 د ئضس ال ايدلسيت! .بابا وّبْغورْ ولْ ترسي تمنجيوت-سْ، يچو تغوفّي سْ ممّي-سْ دْ وول-سْ يرّزْ ولْ يسّينْ باتّا غاديچ! اديلمز يسّوسمْ ، اماغر يڤُّد اديندل تدارت-سْ س ئفاسّن-سْ .يطّف دي ربّي يوجمْ ، ال دياوض ممّي-سْ مڔاو سان ئلان، دامكروس يا ؛ يقّيم-اسْ تاموڔتْ ينّاياسْ :"تلّي-د اسّ-و د ارچازْ ترني-دْ تمْدي-دْ ! تانميرت ايوش ! نشْ غسغ اتّلي-دْ د انجيمْ اممّي، دباب ن تغاوسا اتّشلي-دْ فْ ئمان-ڜ،نش واش تّدرغ ديما . ماغر تْمادّارتْ اتّامزبالتْ تزبلاّح واسي د ونتيف 06 .ئمزوار-نغّ ول دتڜيرن د ئبانّاضن،

امّانش يقّار ئنزي :" بنّاضْ 07 يفّال تيشيباضْ ".

دباتا دافلا ن تيشيباضْ؟ ايندْ تْفوريغْ، ايندْ د فوغ اوّبريدْ .سوامّن اتزۆي-دْ اتخدم-د تاحنوت ،اش اسّ تامدّيت ايتوش-دْ ادريم س واينّي تجرو-دْ، باتا لاش ولْ تْنيسَ-دْ تادّارتْ ! اغاراغزر س ماني اتّاويتّي-دْ . بابا-ينّي يغس ادّيسڜر ممّي-سْ يسّوفغتيد س ونجلمْ د تْنَتْفي .اتّوغ مامّا ن ومكروس تسّوسمْ تّسغادا تسلا. سي يفّغ باباس تقل-اس تنّاياس :"ول تّارّا غل وول - ڜ اممّي ولْ تّاچا تغُوفّي، مي تسيصّ-د ادريم اشوشغ توشداست ئي بابا-ڜْ تامدّيتْ. امّوني تدول-د ماما اش اسّ اتّيشاس ادريم ئي ممّي-سْ ئتّيشّاست ئي بابا-سْ. سا غا ديطّف بابا-س اين ودريم اديضال س اتّاقتْ غل وزغار اتيكلي تيرست تادرغالت. د ممّي-سْ واسّ يتّيوي ڒاڒا ماغر ول يوديه

غف-سْ. زۆان وسّان د ئيّارن قداناس ئدريمن ئي مامّا ن ومكروس، تنّاياس: " تازوّات-يكُ اتكركور، اغار اتخدمد ف ئمان-ڜ تجرو-د اريال توشداس ئي بابا - ڜ ايني يغس تمدّيت. باتّا لاش ول تنيس-د تادّارتْ.

اڔا-نّي يسّوف يسخومبر يقّيم يتنڤمر ،ول يسّين باتّاغاديچ؟ غل ماني اديزۆا باتّا يسّوفغت بابا-سْ سْ تدّارتْ؟ !.

غل وشّا ئشمّر ئمان-س امكروس يزۆا غل اسّوق اديبرس ف وخدام، ياف ادونيت اتموغوش س مدّن. اش ئڤّن يدوا تغاوسا-س ، ايني يلاّ ئبرّس ف وخدام ؛ ياف ئڤن وسّار شتاينّي مايلاّ ئجنّي ئسناين تسناتين اتّندونين ديدشڔا ئضيضنين س وسان د تيزين يتزلون يقّار :

باتّا ن تمدّورت ئي ونجلوم -------- د واسي تْلقَي-سْ يتْ نودّوم !

مدّن زومن تڤاحارن ---------- هبّرن ف تجلضيمت د وغروم !

مدّن تغارن غل وخدام --------- د نتّا يرجّا يسّوچّوم !

وي غسن تيدرين اديسسو -------- باتّا وْهُو تونت-س دْ لُوم

اون ومكروس يقّيم يسغاداياس ئي وزمني يتّاوي-د ئزلوان ، ينّا دي وول-سْ : "اتّنيم يسّاوال غف-يي، اتّنيم ديوش يوزنييتي-دْ ".

سي يقدا ئسستنتْ : "ا ددّي-نّغ ايزمني؟ امي وفيغ ايتسخدم-دْ؟ اينّي تغسد ادتچغ؟ لّيغْ برسغ ف وخدامْ  أ ي لّيغ درغ ول اخديمغ؟ "

يقّل-اس اين ؤزمني يرّ-اسْ : " اقّارن ئمزوار وار تغاوسا تاملاّ-س تفسا " ايني زۆان يزۆا . والْ اتّيلي د ونتيف ! . بتّا ئي تسن-دْ ئزيغ؟

ؤلا د يڤن شرا " امكروس يرّ-اسْ . ينّا-ياس ؤزمني : "اش اس ايتشمڔ-دْ ئسناين اتسنايين د ئزمبيلن د ئشوارين ايتنزّنز-د اسّوق سي غبشا ال تمدّيت، غرڜ ادريم ئڤّن. يزوا ؤمكروس ئشمّر اين ئبسّيون ف تغروين-س 08 يافيتن اڒّان غف-سْ ولْ ينّي ؤلا أه ! يلمڒ امّن. ول يلّي س ووداه 09 ! ول يلّي س تيدي تستّي ف ؤرناي-سْ د ئچاين-سْ . سي يسّمدا أ سّ-سْ نا يدول غل غرسن د ييري-سْ ينكض د يضارن-سْ اڔزن، ايندْ واسي ولْ ينّوم س وخدام سي مڒّي ! ياتف تادارت ياف بابا-سْ تيزفري يسّوچوم-اسْ، زدّيغ واسّيول ؤلا دوالْ يوش-اس اين ودريم ئي يسعا ئي بابا-س، يطّفتْ يغس اتيكلي س اتّاقت، يبهز ممّي-سْ ئنهباست س ؤفوس-سْ ينّياسْ :" اسّْ أ يّولو دنش ڒمكغ ،ول الّيغ س وبكبك ن تيدي ول اليّغ س ووداه دوول-يكُ يتّدّي. بابا ن ومكروس يصُّو د مامّا تقّس س ئمطّاون. بابا ئحبنن ممّي-سْ ينّاياسْ :" ئمار-و تلّي-دْ د ارچاز ن تيدت ! اماغر اتوغغ اسنغ ماما-ڜ اتّوغ اتّيش-اڜ ئدريمن ، سْ وامّن ولْ تداخ-دْ ولْ تعريڤ- دْ .امّغ د اس-و تلّي-دْ دباب ن تغاوسا تسن-دْ ازلْ-سْ .اسّا غل دسّات اممّي اشڜ اتڔزم-دْ تاحنوت تسكوتر-دْ ايتلي امّنش انّان ئمزوارنّغ : "ادريم د تنميّرتْ " .

امّوني ؤمكروس يسل اوال ن بابا-سْ دولن-دْ د يمدوڜال اچّورن خدمن تاحنوت اس نامرن ايتلي-نسن ال ديلين س ئمركانتين ئمقرانن ن ئغرمان .

-----------------------

03 اغرباز ،ج ئغربازن: مدرسة.

04 تيسدّاويين، ج تاسدّاويت : جامعة

05 انجلم : الكسل ، الخمول.

06 اونتيف ،انجلوم : الكسول ، الخمول.

07 بنّاض ج، ئبانّاون = المتسكع.

08 تاغروط ، ج تيغروين : الأكتاف.

09 يوده، اوداه : تعب تعبا .

 

المرجع : : انثولوجيا الأدب المزابي ⵉⴷⵓⵔⵔⴰⵏ ⵏ ⵜⵙⴻⴽⵍⴰ ⵜⵓⵎⵥⴰⴱⵜ‎