امدياز

للشاعر الحاج يحيى أحمد ن عمر

امدياز ويجي دونّي لان يفرص

دي تسيوايين-س ؤدوس ن ييوالن

مي يلا ي تّالس ، انزار د وكرّا

سوفير ئكلّيد ، حملد يا ئسافّن

سغداس ئي تزننط اتندّر تقار

تعيا سْ تجناوْ ئي ديسنت اطّانن

امدياز ويجي د ونّي ئي تّقنن

دنّج ويسومس مناو ئريضن

جار ئملالن يتّقّن داملال

يتقن دابرشان جار ئبرشانن

بتّا يوفو الحال يزوا غل وزغال

يتّفغ س وايريضس ؤلا جار ميدّن

ئمديازن ويجي ئضارنسن تيرغين

ئي وركاس اتافد اطفن ئفاسن

ئمديازن ويجي اسّن تاڤرولا

ادچّن تاقيميت ئي لاتاي د والاّون

ؤرغ ،لحرير،اتّيم ديدلال وّوسان

سّينجلن سي زوانط تيطّاوين-نسن

امدياز غيري تّيسيت ن ميدن-س

ازعيم دوشتيم دي ميدن-س اتّسنن

امدياز غيري ديلس ن ميدن-س

يسّاوال امشان ن يغلب ئلساون

امدياز غيري انّتّا د امسفار

تيسيوايين-س ديسنت ئ سفارن

امدياز غيري د ونّي خسن تيدت

تيدت اتّام يرجازت يقّاريت امّن

امدياز داسر امانس تيمسي

باتّا دي ودمس منّاو ؤدماون

امدياز ويجي داجليم يتوادباغ

توّارت ئي ومخاض، قرباش ئي يجلادن

امدياز غري عمري ول يينيز

يتُّڤُّد لكان ئي ربّ ن ميدّنْ

باتّا امدياز ؤهو دامّونّي

اونتّينيغ ، تعيا س وجراون

09 ئبرير 2009

 

المرجع : : انثولوجيا الأدب المزابي ⵉⴷⵓⵔⵔⴰⵏ ⵏ ⵜⵙⴻⴽⵍⴰ ⵜⵓⵎⵥⴰⴱⵜ‎