قصيدة اس-انّغ د ازقاغ

للشاعر عبد الوهاب فخار

 

اس-ڜ د اوردي 01

اتاوات مي بدّغ

اتّالسغ ف دزاير

ؤل-ئكُ سْ تزا-س

تّافغ-ت يتّدي

ئنافّن-ئكُ دچورن

س ؤزور غل وزور

لوكس يجان لختنّي

اتّافغ-ت د مُفدي

مُفدي مي ييوض

يزدغ وول ن حد

يدو ڤُل-د د أضغا

وي تّوغن د ئجدي

مُفدي وا سّلن

اد يضبع ئضس

ال يوريرن "لوراس"

بدّن-اس دابدّي

"قسما" ينّات

يرّعد ؤجنّا

تامورت سي يجّول

تغمي-د سْ ئد دادّي

ئخيسان ؤسّان-تش

اتُّوغن ا مفدي

دوڤول مي ينّا ،

قّارن :" كاسْ كيلْ دي؟"

ئمارو " وابلي و"

غي ينهّتْ دُّويتنْ

ئمسلمن ماني الان

كرمن س تيڤُدي

اڜ ئڤّن يقّار:

"خْطي راسي واضرب"

لموهيم مي الّوزغ

اي-دكلين ئمندي

اڜ ئڤن يشّات

دي تيتي ن شتمبر

د وول-نسن يقّار :

"تلعتاس ئي لمهدي".

"لمهدي الم نتظر "

تالقّي ن ليسلام

مادام ؤلاون

د تنفوست ول تقدي

باتا غاي تخسد

ا مفدي اش ئينيغ

اغنجانغ يجمض

يزلف امودي

ووني دالاّ س-ئكُ

اسّ-و فْ دزاير

ؤش-يد تامزوغت

امفدي تسلدي

وال تطّف تابجنا-تش

دي وايني غاد تسلّد

غي جّيي ادلسغ

ا وال اقّار : "وخدي"

تونيّو د اتانفوست

سل تينيدانغ

مانت وبريد يقّيمد

اسّ-و داوحدي

ا مفدي غير اجا-تش

س وسان ئي نلا

اسّ-نغ دازوڤّاغ

اسّ-تش داوردي

ش تشين اتّايدرت

نشنين د الحبّات

سي نجرو ڤاع-نّغ

تايدرت ول تمدي!

مُفدي س ادزاير

دزائر س مُفدي

وي زونن جار-اسن

غل ربي ول يزدي

ئي وي خسن تاشتمي

شتشين د هيتلر

ئي وي د زلن فوس-س

شتشين د غاندي

ئي تفاوين ن ٷوّمبير

شتشين اتّيرغت

ئي يسافن ن جوليت

شتشين د لعايدي

وي انان وجي دام

اديشمر ضاض-س

شتشين غي سوسم

اسنغ-اتش تسندي

ماما-نغ تامقرانت

توشا-تش تانميرت

دماما-تش ن وغلان

ول تني تتّيدي

تنّا-ياتش اممي

شتش اتاشرّافت

اوّت ماني تخسد

اممّي تينيدي

ئسافن-تش تّاوضن-د

ا ل ماني نلا

ٷلا تفغد غف-يي

س لخير-تش ترنيدي

ئي تفاديت ن ٷمزاب

شتشين اتّالا

ئي تلازيت نتاف-اتش

تعوشت ن ٷودي

مفدي ينّاياس

د هانت أياما

ڤاع ايني حوسغ

دويزجن توف يدي

* 16 فورار 2002

----------------------

01 مؤسسة مفدي زكرياء، من حنايا الجزائر،ط،المؤسسة الوطنية للفنون المطبعية، الرغاية-الجزائر 2005 ،ص 433- 439

* القيت هذه القصيدة في ملتقى مفدي الدولي المقام بغرداية أ أيام 16-17-18 فورار 2002 بمناسبة الذكرى 25 لوفاته.