واغا دسيجلن أكركور ئوموش؟

ئنزان أتنفاس نات مزاب  أمثال وحكم وقصص مزابية 6

الشاعرمصطفى بن كاسي العلواني

أنبراس، أمدياز، أسلماد: مصطفى ن كاسي نات علوان ( زينون)

العلواني مصطفى بن كاسي

ووني ديگن سينزان ئتواسنن آش أنشان، ؤجي غي أغلان..

يتوانا أون ئنزي ئواسي يساوال سيلسس ؤبرك ، مي تيوض تيدت ن نواجا أتافت يكرم ، أمغ يتصصفد، يتادجا تيبعبوجين..

تمدورت تخس دواسي ئلان يساوال يتادجا سوايني يساوال.. يساوال ألقد مانشي أدينجم أديدج..

تانفوست نيغرداين دوموش

ئقن واس سيوسان ن بكري ،أتوغن ئغرداين عمرن ئكت تدارت نيمركانتيين، ادجين ديس أجلف ، أوفين ديس أيني أددرن أسيس ئنتنين أطاروانسن ، أطاروا ن طاروانسن..

أدجين فيلجا أيتلي ناين تدارت، أمي غيتتن أوبرك تتن أسفسادن.....

ئگن واس ، باب ن تدارت أولينجم، فاون المنكر، ييويد ئگن أموش يگده، ئياون ئغرداين ،يخس أتنيتس أسوبريد...

موشني آس أمزوار ، يشوا مناو ئغرداين ، ئشاش بابس سيتخزر آش اس ئتت ئغرداين ، دويتليس يوفيت أوليمنكز...يدولد يتهلا ديس سويسوم دوغي ....

.

.

دسات واموني....جرون ئغرداين جاراسن ئفرينسن، يناياسن أكروا نسن: أسو أجروغاوم أنشمر أنسرس فوموش دتواغيت ئيلا يدجانغ..

يلا يدجو فيلدجا دجنغ، يلا آش اس أديش ئگن أسجنغ، باتا نقيم أمو مناو وسان أنقدا...

ونلي نتنجم أنفغ أدنبي باتا أغنش، باتا نقيم أمونوني ، أنمت أسو دسات أشا...

يااللهت ؤشتانغد تاضفي ، تينمانغ باتا أسندج ئياون ؤموش؟؟؟

أسيولن مناو ئغرداين ، أوشين أيني أسندلوين أستدجن ئياون أموش ، أولا ديگن أسيسن ميدييوي أشرا يبها أتدجن....

سواسوا أخسن أدسرسن ئسني أمان ،..ئشمر ئگن سيغرداين فوسس، يوشاس أكروانسن أوال ، ناينايسن:

أنجرو مناو وزالن ئفسوسن ئتسرسيرن ، أتنقن ئكت تنلي أندج أسيسن ئگن أوكركور، أستنقن أشروم نوموش،.....

أدندول نتفغد ، نترار، نتحوس، أنتت ملمي نخس أيني نخس،.....

غي أسنسل ئوكركور يتسرسير ، انرول أينولو غليفرينغ....

أوتناس توجميزت أيولون فاون تضفي، دلحداگت أسيوشو يوش ئياون أوغردا......

غي أمو يرزاسن أشاشينسن ئگن أوغردا يحدگ، يناياسن ، أوال ن يوا أغردا ئيوشو يبها آمش، بصح أويسن د مانايو أغردايو ئلان أدسيجل أكركور ئوموش أشرومس؟؟ تليم تسنم أشرايو أوجي دورار؟؟

أختني أدويتن ، ابوكشن أيولون ولنجمن أدرنين أولا ديگن ويوال..

نتيدت أوفين ديكت تمشروست تازعلوكت دساتنسن .....

آش ئگن يدولد يتقل غليمدوتشالس توالم أديشمر ئگن أسيسن فوسس أديني انش أستوجلغ، اليغ دا......غليمارو أوليتوشمر ئقن أوفوس..

سيختني أتوابي أون تنفوست أتوادج دينزي اقارنت جاراسن ميدن ميجرون أساوالن فيگن أشرا أدينين، ئواسي يساوال أموني أوبرك: أدج أوالتش أتازيويتش ، سيول ألقد منشت أتنجمد أتدجد ، توشد أوال ئلان ديس تاضفي ،أمي أوال أوبرك أولا دلهوير أساوالن...

أنبراس، أمدياز، أسلماد: مصطفى ن كاسي نات علوان ( ينون)

العلواني مصطفى بن كاسي

تغردايت ، الجمعة 23 جوان 2017