حدن آن لوضواض ديد ئغرداين

حدن آن لوضواض ديد ( مع) ئغرداين يستشناد تغماسس ، ديد ئجوضاض يستشناد أفريونس

أنبراس، أمدياز، أسلماد: مصطفى ن كاسي نات علوان ( زينون)

العلواني مصطفى بن كاسي

ووني ديقن ئنزي يبها آمش..

أنان ئمزوارنغ يوش أتنيرحم ، ئواسي وليتبدي فويوال ئگن.. يخس أديلي ديد ميدن أيولو دازعيم باش أديقدا تغاوساس،

أولا يسرتشس أمغ ينا ئوالن ، يدج تيمدجا أوجي دلمندادس ، أمغ أوللينت تاونجيمتس....

يخس ماني يزوا أتخسن ميدن أدينين يلا أنسن...أدينين أشرايني داملال أسنيني ..إيه ، أولا اختني أناناس دابرشان أسنيني دخ ... إيه.

هامي؟؟ أمغار يخس أديقدا أتغاوساس وليتيغ لاسينينو لاسينينو...

ووني أسروزنتيد آت بكري ئيلوضواض: أنمانشي نسن يروزد ئوغردا وودمس أتغماسس، يروزد دخ ئييجوضاض سوفريونس دوافاجس غلوجنا..

تانفوست نلوضواض ن سن وودماون

ئگن واس سيوسان نبكري، وار، أجليد ن تجمي ..يجرو لهوير أيولون دساتس ، يخس أسنيسيول فيگن أشرا يضرا ...

سيوايني ينا : أسو جروغاوم أميدنيك ديلخير، أونينيغ بلي أسناط برشن عفو( الإنسان) يدجيي ئكت تكرارت أتوطفغ ديس بلا مادسنغ،

يطفيي عيو سوزاقا، وييسل أولا ديگن اسجوم..

أسودجمغ غي ملمي أديبي ألمكحلتس أتيفرغ ديجي..

أمو غي بسي سلغ ، ئگن ويوال دازداد دساتيك ، أقلغ غرس آفغ ديگن أوغردا سيغردايننغ، ينايي حماليك أليغ دا أداديك وار، أشدسوفغغ أساني ئمارو؟؟

اقلغ غرس ، أنيغاس : نشين دوار داجليدنوم ستزمارت ئغيري وولنجمغ أددفغغ، شتشين غي دموتشو أيتسوفغد؟؟ أولسينغ أدصغ أختني أمغ أدغرتغ ديوايني ئليغ ديس..

أمو غي بسي بسي يبدا ئكرد استغماسس أين تسرمغت ئليغ أتواطفغ ديس ، نايدج ئگن أولون دازعلوك أفغغد أسيس رولغ شمرغتيد سنج تغروطيك أنشين أقيمغ بارغ..

سوامني أخسغ أسوشغ تيفيرت أسو ياون أوغردا دايولون ئغرداين ئلان داني تاجمي.....

سييلا ئتيشاسن تيفيرت ، ياتفد ديد ئغرداين ألوضواض : يناياس حماليك أوشيد تيفيرتيك أولا أنشين ...

يراس وار :ماهلا شتشين داغردا، أنيغ غي ئغرداين برك؟؟

يسوفغازد ألوضواض تيغماسس يستشناس وودمس ، يناياس: أخزر وودميك يروزد ئوغردا ، أولا أتيغماسيك مسدنت أنتا، أمغ أوجار..

لوكان أوسيغد فيديستش أختني أولا أنشين أشدسوفغغ أسيني ستغماسيك..أتوالم فيسع غفس...

يومنت وار يوشاس تيفيرتس...

أمو ،زوان مناو وسان ، يجرو دخ وار لهوير نتجمي أيولون ، يناياسن : أسو جروغاوم باش أونينيغ باتا أيضران أسناط..

أسناط، أليغ أدجورغ أيدر نيغزر، خزرغ سوف ئدوسين ، غرنغ أشحال ميتنخزر، نتوغ ديلا ن ديد تورميزي..

ئنزغ أدسوغ بسي نوامان أيسبهلن ديسماضن أحلون....

ديد واينيزيك ، زلگغ ناياوييي ئغزر ئقوان...

ونجمغ أدفغغ أسيس ، أعييغ أتزاگيغ ،واييسل أولا ديگن أسجوم..

غي تاحجامت أتوغ تازدايت تسقوروت توسد أتغار ، تكلييد تيسرمخت ئتتشمر سوغمبوس ستما، تقنت تازدايت ستما تيضيضت ، أطفغ ديس أليغد بسي بسي ..

..تليم أترگبمي ئمارو دساتنوم أدرغ.....

أسوامني أخسغ أدوشغ أسو تيفيرت ئياون أتحجامت ، دخ ديوايولون ئجوضاض ئلان داني تاجمي...

سيلا يتيشاسن تيفيرتنسن ..ياتفت ديد واموني ألوضواض ، يناياس : أولا أنشين حماليك أيتوشد تيفيرتيك ،

ئسستنت وار أنتا يحمق، يناياس: شتشين داغردا باتا جديوين غليجوضاض..؟؟

يناياس حماليك أقل غلوافريونيك ( يرزماستن أختني دساتس)، يناياس أولا أنشين أتافجغ أجنا أن وجضيض، أمي أليغ ديني ختني أشدسوفغغ، فيسع أوجار نوجضيض.....

أختني يناياس وار ،" تالقيس واسي أنلوضواض ، ديد ئغرداين يستشناد تغماسس ، ديد ئجوضاض يستشناد أفريونس.. "

ئزاقا فلوضواض يناياس أرول أسدساتيك ، تسند ساغاديليغ أدرغ أمغ ترواك أداسن أسدفريك ، باتا نوفاش ئگن واس دسا تنغ أشنغ...أتوله فيمانتش

سي ختني ألوضواض يسكرم ئمانس يدولد ولديتفغ سغبشا ، يتفغد غي ددجيض ميلا وار ئطس أمغ ولتيخزر أولاديگن سلهوير..( توني أتانفوست أوبرك ، أوجي نتيدت)

سيختني يتواطفاس أوالو ئلوضواض ، يدولد دينزي أشاتنت ميدن جاراسن ، فواسي يخس غي ئمانس يخس أديلي ديما ئقدا أتغاوساس ، وليتيش زازا فويوالس دتمدجاس.

أنبراس، أمدياز، أسلماد: مصطفى ن كاسي نات علوان ( زينون)

العلواني مصطفى بن كاسي

تغردايت ، الإثنين 19 جوان 2017